Alla Itolae Nusa 50
Eleki Yusupe irani kai intulu nopa amai oalaleije kai iatai.
Eleki Yusupe iulake loktele kena iono nsekie amai Yakupe. Hoko esi ansekie Israele leke tatike pine Yusupe kai kwalinisi likui lori Kanane.
Makerike ansekie Israele petua butu ata. Eleyo tamata Mesire esi ranieni petua butu itu.
Eleki petu kena ranie Yakupe elia peneka eleki Yusupe ibeteke kena Pirone eni tamata makerike be,
“Au beteke kena imi leke imi beteke kena Pirone,
be amaku iulake au la lokoi be, ‘Takwali mo au mata neka, hoko likele benai rebe au kalie ndi tape Kanane, ete mere hnouke au kenae.’ Ele mere hoko suka le au leke au keu hnouke amaku kenae pine au leu.”
Eleki Pirone ibeteke be,
“Akeu lori Kanane kena hnouke amamu lulu ala lokoije.”
Eleki Yusupe ikeu lori kena ihnouke amai. Kai Pirone eni tamata makerike eteije boka esi keu sakesa kaini, kai tamata elaka rebe me Pirone eni luma kai tamata elaka rebe me tape Mesire lekwe boka esi keure neka,
kai Yusupe eni bina kai eni tamata maka ulake boka kai kwalinisi kai tamata rebe rue me amai eni lumare, batuke Yusupe eni nanaru kai eni pipi kai dombaru kai sape eru rue me Gosene.
Hoko kereta kai tamata rebe sa kuda esi keu sakesa kaini lekwe eti ono lalane luluti elake titinai. Kereta meru kena raka lataije kai liku taneia bei me Mesire lori Kanane le lauke.
Eleki kena esi roma me Goren-Hatate me kwele Yordane esi tebai sapaleuke lematai sa, ete mere esi rani malere kai nulu. Kai Yusupe isusa loko amai petua itu.
Eleki kena tamata Kanane esi selu susate me Goren-Hatate esi beteke be,
“Meije tamata Mesire esi rani malere kuate kai atate maka hnouke mise kuate.”
Hoko esi ono otoi rebe me kwele Yordane tebai mere esi nane Abel-Misraeme.
Eleki Yakupe eni nanaru esi ono lulu esi ama Yakupe italuke etesie.
Hoko Yakupe eni nanaru esi sabu kwele Yordane eleki esi kerini siba lori tape Kanane kai esi hnoukeni kena liane benai me ndinu Mahpela tehaike Mamre, rebe Abrahame isabe bei Eprone tamata Hete, kena hnouke eni matale.
Eleki kena esi hnouke Yakupe pela peneka, Yusupe kwalinisi kai pusue tamata rebe esi keu sakesa kaini kena hnouke amaije esi leu pususi lopai Mesire.
Eleki kena Yusupe kwalinisi noake be amai mata peneka hoko esi beteke be,
“Meije tinai neka Yusupe ilelie iteki nsalale rebe ite ono eteije.”
Eleki esi ulake beteke naune meije ete Yusupe be,
“Kena iteki amare imata mosare ihnau ami leke
ami beteke eni naune elere ete Yusupe ale be, ‘Lalemu tiake kwalimusi le esi ono susate ete ale yanoma.’ Hoko meije lalemu tiake ami yanoma le ami meije iteki ama eni Alla Eni maka ulake.”
Kena Yusupe ilene naune mere irani le kaplalei titinai le kwalinisi persayeni mosa, le kwalini erisi nete loko esi ono susate eteije sa.
Kai kwalinisi luake lokoi kai esi tatu lokoi kai esi beteke lokoi be,
“Ami luake lomei kena aono ami kena amu maka ulake.”
Po Yusupe ibeteke lokosi be,
“Imi rilami yake le au meije au ono Alla ete imi mo.
Imi ono susate ete au tinai po Alla Ionoe kena misete, kena ono misete lupe meije kena pialae tamata nusa toini bokala.
Hoko rila yake le au riluke manane ete imi kai imi anaru.”
Iono kwalinisi laleisu ndinare ele mere hoko kwalinisi laleisu susa moneka.
Yusupe irue me Mesire rame kai eni luma toini eti eni musuna utune esa butu esa.
Yusupe irue eti iselu eni upuaru kai eni osiaru: Epraime eni nanaru, kai Manase eni nanaru, kai Manase eni nanae Makire eni nanaru Yusupe ibitisi lekwe.
Eleki Yusupe ibeteke loko kwalinisi be,
“Takwali mo au mata neka po Alla Iraka imi kai Ikeri imi siri bei tape Mesire meije lori tape Kanane rebe Ibeteke ete imi kai Ila ete Abrahame, Isake kai Yakupe.”
Eleki Yusupe iulake kwalinisi la be,
“Alla iraka imi hoko kena imi siri bei mei Mesire imi keri auku matale bei meije.”
Eleki Yusupe imata ne, hoko eni musuna utuna esa butu esa, hoko esi ansekieni eleki esi tolani kena peti buini me Mesire.